Economía e Industria informa aos emprendedores coruñeses dos instrumentos e servizos para a creación de novas empresas

Técnicos do Instituto Galego de Promoción Económica (Igape) participarán nunha xornada organizada polo Colegio Oficial de Ingenieros Industriales de Galicia para asesorar sobre a creación de empresas e sobre as axudas ao emprendemento da Xunta. O encontro informativo desenvolverase na sede do colexio (Alameda 30-32) o próximo luns, día 14 de abril, a partir das 19 horas.

Durante a xornada, os técnicos da Unidade Galicia Emprende analizarán tanto os servizos como as iniciativas de apoio económico ofrecidos pola Xunta aos emprendedores galegos, como o programa de axudas Galicia Emprende, disposto paraconceder axudas que poden cubrir ata o 50% dos proxectos, con investimentos comprendidos entre os 35.000 e os 500.000 euros. O prazo para a presentación de solicitudes ao abeiro deste programa rematará o próximo 30 de abril.

Este programa de subvencións a novos proxectos empresariais compleméntase cos fondos de capital risco preparados para apoiar proxectos de novos emprendedores e, especialmente, proxectos con especiais compoñentes innovadores.

Tanto as ferramentas de financiamento como a mellora dos servizos para a creación de empresas a través da Unidade Galicia Emprende foron activados ao abeiro da Lei de emprendemento e da competitividade de Galicia, que eliminou, con carácter xeral, as licencias municipais de actividade, que son substituídas por unha comunicación previa ao Concello.