Dous anos de prisión e devolver os 3.890 euros dos que se apropiou como presidente da súa comunidade de veciños

O presidente dunha comunidade de veciños de Vigo acusado dun delito de apropiación indebida continuada aceptou este mércores unha condena de dous anos de prisión e indemnizar a comunidade pola mesma cantidade da que se apoderou, uns 3.890 euros.

O home, Jesús V., ía ser xulgado na sección quinta da Audiencia Provincial de Pontevedra, con sede en Vigo, pero a vista non chegou a celebrarse ao chegar todas as partes a un acordo de conformidade, polo que tamén foi condenado a unha multa de seis euros diarios durante catro meses.

Ademais, acordouse que o home poida facer fronte ao pagamento da indemnización, de 3.888,39 euros, a razón de 500 euros mensuais, que terá que aboar, a partir de maio nos 10 primeiros días de cada mes. Así mesmo, decretouse a suspensión da execución da pena condicionada ao pagamento das sumas nos prazos acordados.

Segundo sostivo o Ministerio Fiscal, o presidente da comunidade de veciños retirou en varias ocasións entre os anos 2001 e 2002 distintas cantidades de diñeiro da conta da comunidade, que en total ascenderon a unha suma de case 3.890 euros.

Para poder facelo necesitaba o consentimento do vicepresidente, que pasaba “moito tempo” fóra da cidade, polo que se valeu da súa confianza para que a muller lle deixase asinados varios cheques en branco, que el podía cumprir coa cantidade que necesitase co suposto obxectivo de satisfacer os gastos da comunidade.