Cangas aposta polo emprendemento cunha nova actividade

O concello de Cangas sigue apostando polo emprendemento a través dunha nova actividade promovida pola concellería de Emprego dentro do programa da Aula do Emprendedor.

O vindeiro martes día 29 de abril ás 10.30 horas, a Casa de Oficios Lorenzo Corbacho acollerá a charla “A importancia da elección da forma xurídica axeitada para a nosa empresa” dirixida a todos os interesados en poñer en marcha a súa idea de negocio. A conferencia será impartida por Elena González Moldes, representante da Xestoría Moldes.

Durante a actividade analizaranse as claves para a determinación da forma xurídica máis axeitada para un negocio tendo en conta o tipo de actividade a exercer, o número de promotores, a responsabilidade que están dispostos a asumir e os aspectos fiscais asociados a cada unha.

Tamén se abordarán as vantaxes e inconvenientes que conlevan para o promotor a elección das diferentes formas xurídicas: empresario autónomo, comunidade de bens, sociedade limitada, sociedade anónima ou cooperativa.

Todos os interesados en asistir a este evento deberán inscribirse, de forma gratuíta, na Axencia de Desenvolvemento Local do Concello de Cangas, situada na praza do Sinal nº 5, 2º andar, teléfono 986 301 371,  ou a través do enderezo electrónico dlocal@cangas.org.

A concelleira de Emprego Berta Pérez anima a todos os emprendedores a participar desta iniciativa que permite axudar aos futuros empresarios a transformar á súa idea de negocio nunha realidade.