Ángel Gabilondo defende en Santiago que “a curiosidade é a grande calidade da lectura”

Ángel Gabilondo

O catedrático de Metafísica da Universidade Autónoma de Madrid e exministro de Educación Ángel Gabilondo defendeu este xoves en Santiago que “a curiosidade é a grande calidade da lectura” no marco da conferencia inaugural que impartiu no congreso internacional ‘Editando para minorías na era dixital’.

Na súa conferencia, titulada ‘A acción de ler’, realizou unha reflexión sobre a lectura, durante a que sinalou que os lectores son persoas ás que “non lles gusta o mundo no que viven” entre os que se inclúe. Tamén animou aos asistentes a desenvolver a súa rareza propia, xa que “ser igual a un mesmo é aburrido”.

Ademais, na súa intervención asegurou que non todos os que din saber ler saben realmente facelo, xa que aprender a ler é para Ángel Gabilondo “tarefa de toda unha vida”, xa que leva consigo “aprender a elixir e a intervir”. Así mesmo, sostivo que “escribir é ler un texto non escrito”.

A conferencia foi presentada polo coordinador do evento, o escritor e profesor da Facultade de Ciencias da Información Xosé Neira Cruz. Esta foi a primeira actividade de moitas que proporciona o congreso e que terán lugar ata o 6 de abril en Santiago de Compostela.

Así, o congreso contará con diversas conferencias da man de personaxes do mundo literario como Mario Muchnik, editor, escritor e exdirector de Muchnik Editores; Manuel Morán Orti, profesor da universidade europea de Madrid; Ana Santos Aramburo, directora da Biblioteca Nacional de España ou Miguel Anxo Murado, escritor e xornalista, entre outros.

O evento foi organizado por CampUSCulturae, que é unha iniciativa da Universidade de Santiago de Compostela (USC) en defensa das culturas do mundo, do entendemento multicultural e da diversidade e pluralismo. Dende 2011 realizan actividades culturais, como congresos ou exposicións, para defender e estender estas ideas.