A Festa da Merenda de Aiazo agarda superar os 4.000 visitantes e repartir máis de 1.500 tortillas de masa

Xa está todo listo na área recreativa “Os Pasos”, na parroquia de Aiazo (Frades), para acoller este domingo 13 de abril aos milleiros de visitantes que se achegarán á IX Festa da Merenda de Aiazo. “As previsións de bo tempo unido a que xa temos todas as mesas da área recreativa reservadas e aínda seguen chegado peticións fai que teñamos en mente superar incluso o récord dos 4.000 visitantes que recibimos hai dous anos”, explica Tamara Carreira, coordinadora da Festa.

A Asociación de Veciños “Os Pasos” de Aiazo xa ten preparados máis de 200 quilos de fariña, 50 ducias de ovos e máis de 20 quilos de touciño para elaborar as populares tortillas de masa, coñecidas nesta comarca como “merendas”. “Contaremos con 15 cociñeiras traballando con relevos durante todo o día e que farán máis de 1.500 merendas”, sinala Tamara Carreira, quen adianta que “tamén teremos algún que outro cociñeiro e durante a tarde incluso haberá un momento no que teñamos a 15 homes traballando”.

Merendas para levar

A IX Festa da Merenda de Aiazo dará comezo ás 12:00 horas na área recreativa “Os Pasos”, na parroquia de Aiazo (Frades). Dende esa hora e ata o remate da festa poderanse degustar de balde as tortillas de masa. Iso si, a organización tamén ofrecerá a posibilidade de facer merendas por encarga e para levar, en caixas de pizza preparadas para a ocasión. Neste caso, as merendas para levar terán un prezo de 3 euros (ou 5 euros, dúas merendas).

A música acompañará aos festeiros dende as 12:30 horas, momento da actuación da Banda da A.C. Amigos da Música de Ordes, que dará paso ao home orquestra Cé Orquestra Pantasma. A partir das 15:00 horas terá lugar a Foliada da Merenda, coa participación das agrupacións folclóricas Sarillo (Aiazo), Rexente (Ponte Carreira -Frades), As Sobreiras do Ulla (Touro), Leirabuxo (Melide), Tabernícolas de Compostela e as Pandereteiras das Encrobas (Cerceda). Ás 18:30 horas comezará unha gran verbena a cargo das orquestras París de Noia e Ciclón, que se estenderá ata ben entrada a madrugada.

Na que será a súa primeira edición á fronte da Festa da Merenda, Tamara Carreira convida a todos os veciños e veciños da contorna a achegarse a coñecer “unha festa que non ten comparación con ningunha outra, cun produto propio e saboroso, con boa música e nun espazo privilexiado como é a área recreativa de Aiazo, ás beiras do río Tambre”. Así mesmo, confirma que haberá varias fincas habilitadas para aparcadoiro.