A Deputación da Coruña renova a súa colaboración anual co Centro Arqueolóxico do Barbanza

O presidente da Deputación de A Coruña, Diego Calvo, firmou esta mañá na sede da institución provincial un convenio de colaboración co alcalde de Boiro, Juan José Dieste, para o financiamento do programa de actividades do Centro Arqueolóxico do Barbanza no 2014.

A achega provincial que recolle o acordo é de 20.000 euros, o que representa o 53,4% do orzamento total necesario para o financiamento das actividades anuais, que ascende a 37.394,36 euros.

Con  este orzamento farase fronte aos gastos da organización do VII Encontro Arqueolóxico do Barbanza, a edición e publicación dos vídeos, as visitas guiadas ou os obradoiros, así como a posta en marcha das escavacións que se realizan periodicamente.  

Tras a firma, o presidente provincial, Diego Calvo, gabou o “bo funcionamento” destas instalacións, así como “o grande éxito de convocatoria e de calidade formativa” que teñen os encontros arqueolóxicos que se celebran en Boiro”.

O alcalde, pola súa banda, agradeceu o apoio da Deputación e lembrou que “os nosos encontros arqueolóxicos contan coa participación anual de máis de 300 persoas, entre as que se atopan os mellores profesionais a nivel nacional”.