A apertura da Oficina de Turismo de Nigrán inaugura a tempada turística en Semana Santa

Nigrán inaugura esta semana Santa a tempada turística de 2014 coa apertura da Oficina de Turismo Dunas de Gaifar, en Panxón, que permanecerá aberta ao público desde mañá mércores 16 de abril até principios do mes de outubro, o sete días da semana en horario de 10.00 a 14.00 e de 16.00 a 20.00 horas. 

Esta instalación municipal actuará non só como punto de información turística do municipio, senón  tamén de toda a actualidade cultural, deportiva e de lecer, tanto para locais como para visitantes. O próximo mes de xuño sumaranse a esta oficina as de Patos e A Ramallosa.

Rutas de sendeirismo

Con motivo das rutas de sendeirismo convocadas para os próximos días 17 e 18 de abril, xoves e venres santo, a oficina de Dunas de Gaifar permanecerá pechada en horario de mañá. Locais e visitantes terán a oportunidade de gozar de turismo de natureza en Nigrán, coa programación de dúas rutas de sendeirismo para coñecer e gozar o patrimonio natural de Nigrán.

As persoas interesadas en participar deberán estar o xoves 17 ás 10.00 horas na contorna da Capela de San Roque, para a ruta do carreiro Circular de Camos, e o venres 18 na Oficina de Turismo de Panxón, desde onde partirán para realizar un percorrido por moitos dos escenarios que do protagonista da novela “A praia dos afogados”, de Domingo Villar, que interpretará Carmelo Gómez na versión cinematográfica, cuxo rodaxe comezará a principios do mes de maio.