Yolanda Castaño ofrecerá un recital poético multimedia na Casa da Cultura de Neda

A coñecida poetisa galega Yolanda Castaño ofrecerá este venres, 14 de marzo, un recital poético multimedia en Neda. Espectáculo que forma parte da programación de actos deseñado polo Concello para conmemorar o Día Mundial da Muller. Dará comezo ás 20,30 horas coa Casa da Cultura como escenario. Presentará ao público de Neda un novo e atractivo xeito de comunicar os seus versos facéndoos dialogar coa linguaxe audiovisual e as novas tecnoloxías. Un espectáculo dirixido ao público mozo e adulto incluído no Programa “Ler conta moito”, da Secretaría Xeral de Cultura da Consellería de Cultura, Educación e Ordenación Universitaria da Xunta.

Os actos do Día Mundial da Muller continuarán a próxima semana. Así, o venres 21 de marzo, no mesmo escenario e tamén ás 20,30 horas, a compañía 3DTrans representará a obra teatral “Ride, ride!”, un espectáculo dunha hora de risas garantizadas, onde as súas protagonistas repasarán, co seu particular sentido do humor, o vivido e sufrido durante a súa experiencia televisiva. E é que 3DTrans está integrada por Sabela Amado Rojo, Cristina Mariño e Cristina Moreira, recentes gañadoras do concurso cómico “Os Humorosos” do programa Luar da TVG.

O programa “Relacións afectivas en igualdade” completa o calendario municipal de actos do Día Mundial da Muller. Está dirixido ao alumnado de primeiro e segundo de Secundaria e primeiro de Bacharelato do IES Fernando Esquío e a través do mesmo ofreceránse obradoiros de dúas horas de duración impartidos pola educadora familiar Celia Sabín Vázquez e a animadora sociocultural Natividad Villaamil Abad.