Unhas 400 voces de 11 agrupacións daranse cita en Ponteareas para participar no Festival de Corais
Preto de 400 voces de 11 agrupacións daranse cita en Ponteareas para participar no Festival de Corais que organiza a Deputación de Pontevedra e que se celebrará en Ponteareas o vindeiro 6 de abril.
As 11 corais participantes elixíronse por sorteo entre as 49 agrupacións da zona sur da provincia que se presentaron ao certame. A elas sumaranse outras 11 que actuarán no auditorio municipal de Valga o 27 de abril e que se elixirán tamén por sorteo o vindeiro luns, 24 de marzo, entre os grupos da zona norte que se inscribiron.
Cada unha das corais participantes interpretará 3 temas sen acompañamento musical (a capela) de elección libre, co único requisito de que un deles deberá ser en galego.
A coral encargada de abrir o certame en Ponteareas será a Polifónica San Pedro de Domaio, de Moaña; á que lle seguirán Ecos do Folón de Fornelos, O Rosal; Coral de Baredo, de Baiona; Coral Polifónica Valdarrosa, de Ponte Caldelas; Coral Polifónica Ponte das Febres, de Tui; Coral Polifónica A Raíña, de Redondela; Coral Centro Social de Tui; Coral Alvedosa, de Redondela, Coral Polifónica A Forna, de O Porriño, e Coral Polifónica de Tomiño, para pechar as actuacións a Coral Santa María de Areas, de Ponteareas.
A orde de actuación das 10 primeira corais vén definida polo número de integrantes de cada coral, comezando a que menor número de voces ten e rematando a máis numerosa; para despedir o certame como anfitrioa a coral da localidade na que se celebra o festival.