Un total de 16.896 persoas utilizaron as casas de préstamo do Concello de Oleiros en 2013

Un total de 16.896 persoas utilizaron ao longo do ano 2013 as casas de préstamo que o Concello de Oleiros pon a disposición dos veciños e veciñas do municipio para organizar festas e celebracións. Os inmobles de Agramar, Echeverry e Bastiagueiro rexistraron un total de 584 usos nos 365 días do pasado ano. A demanda deste servizo incrementouse interrompidamente desde a súa posta en marcha ao longo da pasada década. Deste modo, en 2013 o número de persoas usuarias incrementouse en 484. A casa máis utilizada foi a casa da praia de Bastiagueiro, que rexistrou ao longo dos doce meses un total de 254 usos nos que participaron 8.920 persoas. A segunda máis utilizada foi Echeverry con 200 usos e 4.692 persoas usuarias. Por último sitúase Agramar con 145 usos e 3.364 veciños e veciñas participantes.

Os requisitos para poder solicitar unha casa de préstamo do Concello de Oleiros son estar empadroado no municipio e ser maior de idade; de non ter máis de 18 anos, a solicitude deberá ser asinada polo pai, nai ou titor da persoa solicitante. O seu uso é totalmente gratuíto. A solicitude debe cursarse cunha antelación máxima de 2 meses e mínima de 5 días. A persoa solicitante deberá facelo persoalmente, presentando a solicitude modelo, que encontrará no Concello, debidamente cumprimentada, no rexistro municipal. Antes deberá consultar a dispoñibilidade dos locais na oficina de casas de préstamo, sita na primeira planta da Casa do Concello. A única obriga será deixar a casa ordenada e limpa: todas elas dispoñen de utensilios e produtos de limpeza. Ademais destes tres inmobles, o Goberno local pon a disposición dos veciños e veciñas outros inmobles en cada parroquia a través do Departamento de Cultura.