U ramal de saída a Cangas do Corredor do Morrazo atópase cortado por mor dun novo desprendemento

A Consellería de Medio Ambiente, Territorio e Infraestruturas vén de pechar ao tráfico o ramal de saída a Cangas (marxe dereita) dende o Corredor do Morrazo, por mor dun desprendemento rexistrado esta mañá.

Á altura do punto quilométrico 12+000 da CG 4.1, observouse risco de deslizamento do noiro no desmonte do ramal, polo que os técnicos estableceron como medida preventiva pechar o mesmo. Posteriormente, producíase un desprendemento neste punto.

Esta mesma mañá os técnicos da Xunta de Galicia xunto cos xeólogos visitaron a zona para inspeccionar o sucedido e analizar as medidas a adoptar. Debido ao risco de producirse novos deslizamentos tomouse a decisión manter o corte do carril de saída cara Cangas.

Tamén esta mesma mañá se iniciaron os traballos de limpeza da calzada.

Como consecuencia do desprendemento, os usuarios que desexen acceder a Cangas deberán continuar ata a saída do punto quilométrico 15+000 do Corredor do Morrazo, o que supón un percorrido a maiores de tres quilómetros aproximadamente.

Antecedentes
O pasado 8 de febreiro produciuse un desprendemento noutro punto deste mesmo noiro situado no PK 12. A Axencia Galega de Infraestruturas realizou unha reparación que se prolongou ata o día 12 de febreiro. Tras esa actuación de urxencia mantívose a vixilancia sobre o desmonte para comprobar a súa estabilidade así como a existencia de posibles riscos noutros puntos do mesmo.

Froito desta vixilancia detectouse un novo risco de deslizamento provocado polos adversos meteorolóxicos, o que permitiu pechar o ramal antes de que se produciran os desprendementos.