Turismo da Coruña participa nun encontro profesional en Madrid para a promoción de eventos e congresos

Turismo da Coruña participará mañá, mércores 26 de marzo, en Madrid na II Edición do Meeting Incentive Summit, un dos encontros de profesionais do sector de eventos e congresos máis importantes de España. O organismo acudirá á cita con representantes de ExpoCoruña e Palexco co obxectivo de presentar nun espazo conxunto aos expertos a oferta e as posibilidades da cidade da Coruña como destino de eventos e reunións.

Durante a xornada, o Consorcio de Turismo, que preside Luisa Cid, manterá reunións de traballo con responsables de eventos, travel managers, xestores de asociacións e organizadores de congresos aos que se presentará a oferta da cidade de forma personalizada.

A presenza de Turismo da Coruña nesta feira obedece á estratexia deseñada polo Concello para promocionar a cidade como destino de eventos, feiras e congresos e situala nos primeiros postos do ranking do turismo de negocios, tanto polo seu potencial, capacidade e características para celebrar reunións profesionais de todo tipo, como polos beneficios económicos que xeran estes encontros nos distintos sectores da Coruña, entre eles o comercio e a hostalaría.