Tres novos cantantes interpretarán duetos de ópera e romanzas de zarzuela en Santiago

O Paraninfo da Universidade acolle este martes, a partir das 20,00 horas, a interpretación de tres novos cantantes que protagonizarán o oitavo Ciclo de Novos Intérpretes con duetos de ópera e romanzas de zarzuela.

Serán a soprano Rosalía Cid Tarrío, o tenor Javier Alejandro Ossandon e a mezzosoprano Elisabet Filgueira. Rosalía Cid e Javier Alejandro Ossandon son alumnos de Diana Somkhieva no Conservatorio Profesional de Música de Pontevedra, mentres que Elisabet Filgueira é licenciada superior de canto polo Conservatorio Superior de Música de Vigo. O tres pertencen á Asociación Lírica Encantados.

Para o seu concerto no Paraninfo da Universidade, e baixo a dirección artística de Diana Somkhieva, os tres cantantes han preparado un variado e interesante programa que inclúe arias e dúos de ópera –‘O barbeiro de Sevilla’, ‘As vodas de Fígaro’ de Mozart, ‘Sansón e Dalila’ de Saint-Saëns, ‘Rodelinda’ de Haendel e ‘Carmen’ de Bizet–; romanas –Moreno Torroba e Chapí–; e cancións de Tosti, Bellini, Montsalvatge e Mozart–.

Os cantantes estarán acompañados ao piano pola profesora do Conservatorio Profesional de Santiago Beira Pavlova.

Coa colaboración da Universidade de Santiago, este certame alcanza a súa edición número 16, o que o converte no certame galego máis antigo en activo, especialmente dedicado aos novos intérpretes galegos e residentes en Galicia para que comecen a adquirir a experiencia necesaria nun escenario.

Así, 15 anos de historia e case 500 participantes, explica a USC, “avalan a sólida traxectoria” dunha convocatoria pensada en favor da difusión da música e para prestar un pequeno, pero “imprescindible” apoio ao futuro da música en Galicia, os novos valores.

O programa do ciclo consta de nove concertos que se celebrarán até o mes de marzo, co concurso de máis de 30 novos músicos residentes en Galicia.