Trasladan a Pontevedra os restos mortais do irmán de Rajoy

Os restos mortais de Luis Rajoy Brey, irmán do presidente do Goberno, que faleceu este mércores en Madrid, chegarán na tarde deste xoves a Pontevedra, onde será enterrado o venres.

Así, está previsto que os restos mortais cheguen a partir das 15,30 horas ao tanatorio de San Mauro, en Pontevedra. E o venres ás 11,00 horas terá lugar o enterro no cemiterio municipal.

O funeral por Luis Rajoy Brey terá lugar este venres ás 18,00 horas na basílica de Santa María A Maior de Pontevedra, segundo confirmaron as fontes da igrexa consultadas.

O oficio polo irmán de Mariano Rajoy non será de corpo presente, polo que o enterro en San Mauro celebrarase con anterioridade pola mañá.

Notario de profesión, tiña un despacho na localidade madrileña de San Lorenzo del Escorial. Estaba casado e non tiña fillos. Faleceu nun centro sanitario de Madrid por mor dunha enfermidade que lle foi diagnosticada hai uns meses.

Luis Rajoy era un do catro fillos que tiveron o maxistrado Mariano Rajoy Sobredo, que foi presidente da Audiencia de Pontevedra, e a súa esposa, Olga Brey López. Dáse a circunstancia de que o presidente do Goberno, Mariano Rajoy, cumpre hoxe 59 anos.