Termatalia congrega ao termalismo europeo e latinoamericano na ITB de Berlín

Presentación de Termatalia en ITB Berlín

Termatalia, evento liderado por Expourense, que se converteu en elemento vertebrador do termalismo europeo e latinoamericano, presentou a súa próxima edición durante a ITB de Berlín, considerada a primeira cita mundial do Turismo, ante operadores de turismo especializados e profesionais do segmento de saúde e benestar. Esta presentación tivo lugar na caseta de Arxentina, país que acollerá a celebración da Feira Internacional de Turismo Termal o próximo outubro.

No lanzamento estiveron presentes o ministro de Turismo de Arxentina, Enrique Meyer, Nava Castro, directora de Turismo de Galicia, o presidente de Membros Afiliados da OMT, e do Instituto para a Calidade Turística Española, Miguel Mirones, e o director de Termatalia, Alejandro Rubín. Este acto estivo arroupado ademais polo principal partner europeo de TERMATALIA, a Asociación Europea de Balnearios, ESPA, a través da participación do seu secretario xeral Joachim Lieber, e doutros membros desta entidade que integra aos empresarios balnearios de 21 países.   

Entre os asistentes destacou a presenza de os  principais operadores europeos en turismo de saúde a nivel mundial, como é o caso de FIT-Reisen, operador alemán representado pola súa directora xeral, Claudia Wagner, ou de Euromed Gesud Reisen e Job Travel Solution. Tamén estiveron presentes outros operadores punteiros no sector como o británico Highlives, Costas Galicia Internacional ou Tucano Perú. A presenza destes profesionais reforza a posta en valor da Bolsa de Contratación que se celebrará en Termatalia Arxentina e na que os destinos e hoteis participantes poderán comercializar entre operadoras de varios países as súas prazas termais, de talasoterapia e spa.

Outros axentes do sector déronse cita na presentación de Termatalia Arxentina na ITB de Berlín, procedentes tanto do país xermano, como foi o caso do representante dos Balnearios de Baviera, Alexander von Hohenegg  (rexión do Mundo con maior índice de termalistas), ou de Hungría e Portugal, pero tamén de latinoamérica como foi o caso de termas de Chile, de Brasil ou de medios de comunicación de Oriente, como foi o caso de Qatar.

Con esta acción Termatalia Arxentina continúa a súa campaña de promoción tras as presentacións de FITUR en Madrid ou Lles Thermalies en París, para convocar a profesionais atraídos pola súa conexión termal entre Europa e América Latina.

A feira internacional promovida por Expourense e con sede oficial na capital termal galega de Ourense, volverá fomentar o intercambio de experiencias desde un punto de vista empresarial, institucional e social, impulsando o mercado estratéxico do Turismo Termal e de Benestar. Ao mesmo tempo estableceranse vínculos científicos e comerciais entre ambos os continentes, a próxima vez desde Termas de Río Fondo, na provincia arxentina de Santiago do Estero do 2 ao 4 de outubro.