Rouban material no polideportivo municipal de Lousame causando varios desperfectos

Desperfectos provocados polos ladróns

O Concello de Lousame denunciou esta mañá diante da Garda Civil un roubo cometido na madrugada de hoxe xoves nas instalacións do pavillón polideportivo “Pilar Barreiro Senra” (A Silva). Axentes da Garda Civil desprazáronse ata o pavillón pasadas as 9:00 horas, momento no que se descubriu o roubo e se deu aviso dende o Concello de Lousame.

Os ladróns accederon ao polideportivo tras forzar unha das portas laterais e despois de non ser quen de abrir directamente a porta exterior do almacén, que quedou danada pero non puido ser aberta. Unha vez dentro, os ladróns levaron o material dispoñible: unha desbarbadora, unha muela de vidro e dúas alargadeiras eléctricas (de 25 e de 50 metros). Así mesmo, levaron un dos dous extintores do polideportivo e baleiraron o contido dos mesmos sobre os vestiarios, os baños e a pista polideportiva, onde tamén causaron danos no material deportivo (golpeando e tirando as porterías, os bancos e as mesas). Dáse a circunstancia de que os dous extintores foran precisamente recargados onte mércores.

O Concello de Lousame estima que o roubo tivo lugar despois das 0:00 horas de hoxe xoves, xa que o polideportivo foi utilizado por veciños ata as 23:30 horas do mércores e o técnico de deportes pechou a instalación pasadas as 23:45 horas.