“Para no olímpicos” e “Liñaio Wars” gañan o Concurso de Disfraces de Entroido de Brión

O polideportivo municipal de Pedrouzos quedou pequeno para acoller o tradicional Concurso de Disfraces de Entroido do Concello de Brión, no que tomaron parte case 450 participantes chegados de distintas partes de Galicia. Os grandes triunfadores da noite foron os gañadores das modalidades de Comparsa, “Para no olímpicos” (de Guisande, Brión); e  de Carroza, “Liñaio Wars” (de Negreira).

Por primeira vez nos últimos anos, o tempo acompañou e así puido celebrarse o desfile pola avenida de Santa Minia ata o polideportivo municipal, que realizaron todos os participantes no concurso. O maior premio da xornada, de 300 euros á mellor Comparsa, foi para as peculiares olimpiadas dos veciños e veciñas da aldea de Guisande, baixo a lenda “Guisande sáese”. Os 200 euros do segundo posto foi para “Que vemos hoxe” mentres que os 150 euros do terceiro premio recaeron en “Os trogloditas de Brión”.

Na modalidade Carroza, o primeiro premio de 200 euros foi para “Liñaio wars”, unha divertida recreación do mundo Star Wars. Os 150 euros do segundo posto tamén quedaron na casa, concretamente con “O Brión chinés”. A comparsa “Morte do obreiro español”, con 150 euros, completou o podio. Finalmente, na modalidade de grupo, o primeiro premio foi para “O mundo en bolas”, seguido polos ordenses “El jorobado de Notre Dame” e de “Aí vén o gordo”.

Resto de modalidades

O resto dos premios da categoría de adultos distribuíronse da seguinte maneira:

Modalidade parellas: 1º premio (150 € ) a “Mitos de Hollywood”, de Lorena Gómez Romero e Marcos Martínez Martínez; e 2º premio (100 € ) a “Vida animal”, de Genma ferreiro Losa
Modalidade adultos individual (+ 18 anos): 1º premio (100 € ) a “Vou na ducha”, de Juan Manuel Romero Carou; e 2º premio (75 €) a “Cazador de orcos”, de Hipólito Liñaio Campos.

Na categoría infantil os premios consistiron en vales por material didáctico e os premios distribuíronse da seguinte maneira:

Modalidade infantil (ata 11 anos): 1º premio (vale por 50 €) a “O neno reversible”, de Martín Peteiro; 2º premio (vale por 40 €) a “El viejo duende”, de Catuxa Sampedro Pereira; e 3º premio (vale por 20 €) a “Panorámix prepara a poción máxica”, de Quique Pazos Carou.
Modalidade xuvenil (de 12 a 17 anos): 1º premio (vale por 55 €) a “Castaña sevillana” de Mario Cordo Nieto;  2º premio (vale por 40 €) a “Carallo como pesa o vello”, de Pedro Gronzo Aniceto; e 3º premio (vale por 20 €) a “Guerrilleiros galegos”, de Mario Mella e Antón Carcedo

En total, o Concello de Brión repartiu 2.200 euros en premios. Tras a entrega dos premios, a festa continuou ao son da orquestra “Abanico”, que coa súa música pechou un día de intensa diversión que puxo punto e final por este ano ás celebracións do Entroido na comarca.