Os minoritarios de Pescanova estudan accións legais ante as medidas de reestruturación

Accionistas minoritarios de Pescanova estudan accións legais ante as medidas “agresivas” de reestruturación societaria previstas na proposta de convenio, coas que temen que se vulneren os principios de trato paritario e respecto dos dereitos da minoría.

Así sinalouno a Asociación Española de Accionistas Minoritarios de Empresas cotizadas (AEMEC), para a que o consello de administración da pesqueira continúa obrando con “total escurantismo”, sen ofrecer información ningunha aos accionistas da compañía, en relación ás distintas propostas que se foron formulando ata a data.

“A pesar das reiteradas peticións de convocatoria de xunta xeral que se elevaron ao consello, amparadas nos dereitos que corresponden á minoría, o consello non procedeu a convocar a xunta requirida, incumprindo así os seus deberes fiduciarios máis elementais cara aos accionistas”, sinalou.

En concreto, os accionistas minoritarios estudan a interposición de accións de responsabilidade por estes feitos, que se sumarán así ás xa en curso ao obxecto de “desentrañar” as posibles responsabilidades penais en que puidesen incorrer os membros do actual consello que xa formaban parte do órgano de administración no momento de presentar concurso a compañía.