Os erros seguen condenando ao filial do Azkar Lugo

O Azkar Lugo B non puido sacar nada positivo este pasado fin de semana ante o O Esteo de As Pontes ante o que acabou cedendo por 4-6 o que lle impide abandonar o último posto do grupo I da 2ª división B. Ante os coruñeses a escadra azulona realizou un partido completo no primeiro periodo o que lle permitiu manterse dentro do choque ao descanso. No segundo periodo os lucenses acabaron cedendo á superioridade visitante e no ecuador do segundo acto o choque quedaba sentenciado.

No inicio de partido viuse que sería un choque igualado e pese ao tempraneiro gol visitante aos tres minutos o filial do Azkar non se descompuxo e así por momentos chegaba ata a ser superior ao seu rival, levando perigo á meta contraria e así buscaba o empate, gol que non chegou ata o minuto 16. Dous minutos máis tarde Javi Río desde o punto de dobre penalti poñía en vantaxe aos seus a cal durou moi pouco xa que a un minuto do descanso o O Esteo empataba o choque (2-2).

No segundo periodo o partido cambiou e quizais estivo marcado polo 2-3 para os ponteses que chegaba aos 7 segundos do reinicio da contenda. A partir de aí o baixón no xogo dos locais notouse e iso permitiu aos visitantes aos poucos ir mandando cada vez máis no choque e así ao minuto 24 chegaría o 2-4. Intentaba reaccionar a escadra lucense pero a expulsión de Manu antes da media hora de partido sería a sentenza xa que na inferioridade dos pronistas, o O Esteo anotaba o 2-5. O Azkar Lugo B buscou reducir diferenzas xa con porteiro-xogador a sete para o final e aí chegou o 3-5, pero a reacción lucense non foi máis aló xa que as ocasións non eran claras. No último minuto un gol para cada equipo que pechaba o 4-6 definitivo.

Ficha técnica:
Azkar Lugo B 4: Nacho, Rubén Mouriz, Adrián, Zala e Javi Río, -cinco inicial-, Cabanas, Manu, Diego, Cancio, Asier, Porto e Yago Balsa.
O Esteo 6: Chotto, Héctor, Rober Paz, Rubi e Franín, -cinco inicial-, Gerve, Pelu, Bolly e Gerardo.
Árbitros: Roldán Pérez e Ferreiro Carballal (Pontevedra). Amonestaron con tarxeta amarela a Rubén Mouriz, Porto e Cancio (Azkar B) e a Alberto, Francisco e Héctor (O Esteo). Expulsaron por dobre tarxeta amarela a Manu (Azkar B).
Incidencias: 21ª xornada de liga no grupo I da 2ª división B. Palacio Municipal dos Deportes de Lugo.
Goles: 0-1 min. 3 Héctor, 1-1 min. 16 Zala, 2-1 min. 18 Javi Río (dobre penalti), 2-2 min. 19 Bolly, 2-3 min. 21 Rubi, 2-4 min. 27 Héctor, 2-5 min. 29 Rober Paz, 3-5 min. 35 Javi Río, 3-6 min. 40 Gerardo e 4-6 min. 40 Adrián.O Azkar Lugo B xoga este sábado na pista do Arlequín en data e hora aínda por determinar.