O pleno vigués instará ao Goberno de España a que a cidade manteña os seus órganos xudiciais

O pleno do Concello de Vigo acordou por unanimidade instar ao Goberno de España a que retire as propostas de reforma da Lei de Demarcación e de Planta Xudicial e da Lei Orgánica do Poder Xudicial para que a cidade olívica manteña os seus órganos xudiciais e estes non sexan centralizados en Pontevedra.

Esta moción, presentada polo Partido Socialista, e secundada polo PP e o BNG, ten como obxectivo que se manteñan na cidade as audiencias provinciais e os xulgados de paz “para evitar o afastamento e a concentración da administración de xustiza”.

Así, o segundo tenente de alcalde, Carlos López Font, defendeu que o número de casos que atenden os organismos xudiciais de Vigo multiplican por cinco os que levan en Pontevedra, polo que “non ten sentido a centralización” e “non hai ningunha razón para que esta decisión se materialice”.

Pola súa banda, o BNG mostrouse de acordo, porque esta reforma, “ademais de empeorar a xustiza, recorta xulgados”, cando hai que facer todo o contrario”. Desta forma, engadiu unha emenda –aprobada por unanimidade– para instar ao Ministerio de Xustiza a que, en concreto, manteña o Partido Xudicial de Vigo.

O Partido Popular tamén presentou unha emenda –aprobada por todos os grupos– para esixir que a modificación da lexislación non supoña “en ningún caso” a desaparición dos xulgados na cidade olívica, senón que se manteñan ou aumenten, xa que, “pola súa realidade social, económica e política”, se trata dun lugar “excepcional en España”.

VIVENDAS DE REPÚBLICA ARXENTINA

Por outro lado, o Bloque presentou unha moción para pedir que o goberno municipal dedique a usos sociais as vivendas de República Arxentina, para as que se iniciou o expediente de alienación e a recadación da cal servirá para adquirir os terreos para a construción da Cidade da Xustiza.

Así, Veloso criticou que PP e PSOE coincidan en “desprenderse do patrimonio, malvendendo os pisos” en lugar de “auxiliar” e “buscar unha solución” para as familias. “O feito de que haxa un pacto entre eles, fai que as familias con risco de desafiuzamento non teñan a posibilidade de contar con estes pisos”, denunciou.

O voceiro popular, Antonio Bernárdez, trasladou a súa sorpresa porque este tema “sexa obxecto de pleno a estas alturas”, cando se perderon oportunidades de formular alternativas distintas”. Ademais, reiterou que a construción do terceiro edificio xudicial é unha das “necesidades” dos vigueses e unha “demanda irrenunciable”, xunto ao hospital público, a estación de AVE e a depuradora.

Finalmente, Font manifestou que esta moción “chega tarde” e supón “unha incoherencia”, porque “se mantiveron conversacións con –o BNG– sobre a venda destes pisos e estaban a favor”. Por todo iso, socialistas e populares votaron en contra da moción, que só contou cos tres votos a favor dos nacionalistas.