O director do Igape destaca a forte aposta pola internacionalización de AIN Active

O director do Igape, Javier Aguilera, visitou hoxe na Coruña as instalacións da empresa AIN Active, compañía de enxeñaría enerxética, civil e de procesos industriais que ten conseguido nos mercados de Romanía, República Dominicana e Bolivia contratos que roldan os 10 millóns de dólares.

AIN Active, especializada en enerxías renovables, tanto hidroeléctrica como eólica e fotovoltaica, está a ampliar o seu negocio internacional a raíz da súa experiencia e participación en dous proxectos do programa Primex da Consellería de Economía e Industria. En concreto, AIN Active liderou, colaborando con outras dúas empresas da área da Coruña, Toponort e Novitec, iniciativas nos mercados de Romanía e República Dominicana.

As axudas do plan Primex, que ten por obxectivo facilitar as primeiras implantacións de grupos de polo menos tres pemes en mercados exteriores, están dirixidas a empresas galegas que acaden un acordo de cooperación entre elas para xuntar esforzos, compartir custos e, se é o caso, estratexia e marca para establecerse por primeira vez en novos mercados internacionais para o lanzamento de produtos ou servizos galegos en novos países.