O Concello do Carballiño crea un grupo de voluntarios para a promoción turística

Desde a área de Voluntariado do concello do Carballiño, que dirixe a edil Pilar Caride, abriuse o prazo para todos os interesados que queiran formar parte dun grupo de voluntarios, cuxo traballo consistira na promoción turística do municipio, adaptándose sempre aos horarios e datas destas persoas.

As accións desenvolveranse os meses de xullo, agosto, setembro, até o 15 de outubro, e vai dirixido a mozos con idades comprendidas entre os 16 e os 17 anos, co permiso dos pais ou titores, e desde os 18 aos 30 anos.

Todos os que participen nesta actividade recibirán un certificado da Xunta de Galicia, no que se manifesta que esa persoa estivo a desenvolver traballos no ámbito do turismo. Certificado que lles pode servir para engrosar os seus currículos á hora de atopar traballo nese sector.

Os traballos que desenvolverán estarán sempre amoldados ás súas necesidades de horarios e datas xa que se establecerán quendas de traballo de sesenta días máximo, polo que canto máis voluntarios inscríbanse máis fácil será o establecer quendas de traballo.

Desde a área de Voluntariado preténdese realizar unha campaña de captación para estes grupos en distintos sectores como é o dos estudantes, colectivos xuvenís, etc.

Cabe lembrar que hai uns meses xa se realizou unha acción de voluntariado cun bo resultado, na que participaron uns 10 voluntarios que se centraron en concienciar aos donos de cans da obrigación de recoller os seus excrementos, de non levar aos cans soltos en zonas de recreo de nenos, e outra serie de normas básicas para a convivencia entre as mascotas e os veciños.