O Centro Cultural Carvalho Calero acollerá a terceira edición do Club de Debate de Ferrol

O sábado 29 de marzo o Centro Cultural Carvalho Calero, situado no Ensanche A, acollerá o terceiro Club de Debate. Trátase dunha iniciativa en que participan os concellos de Ferrol, Santiago de Compostela, Pontevedra, Ames Rois, Teo, O Carballiño e Carballo , co obxectivo de  fomentar o uso do galego entre a mocidade ,especialmente os usos orais en contextos formais e informais, e fomentar a diversidade de opinións e a tolerancia, combatendo así os prexuízos lingüísticos.

Na fase local de Ferrol  danse cita  os IES Leixa,  IES Saturnino Montojo e  CPR Compañía de María, este último con dous equipos

Equipo A  IES Leixa –Coordinadora Victoria  Mosquera López (10 membros)

Equipo B  CPR Compañía de María   – Coordinadora Lidia Rolán Fernández (7 membros)

Equipo C CPR Compañía de María   – Coordinadora Lidia Rolán Fernández (7 membros)

Equipo D  IES Saturnino Montojo – Coordinadora Carme Fernández Miranda  (10 membros)

Os catro equipos enfrontaranse entre eles e terán que debater sobre o seguinte enunciado: Vivimos nun país de corrupción,  tema seleccionado por votación entre os propostos  por eles mesmos. Cada equipo terá que defender a postura en contra e a postura a favor, con argumentos e teses que levan preparando desde o mes de xaneiro no seu tempo libre.

 O horario de desenvolvemento da actividade é dende as 09.15 horas até as 16.30 horas, cando se coñecerán os equipos gañadores e as puntuacións dos debates, o que dará paso a entrega de premios.

O equipo gañador recibira un premio de 500 euros e o finalista, de 300  euros. Ademais os dous serán os representantes do concello de Ferrol na final galega, que este ano se celebrará no Teatro Jofre o 26 de abril . Nesta final participarán oito equipos, dous  da comarca de Santiago de Compostela , dous do Carballiño, dous de Pontevedra e dous de Ferrol.

Mecánica de cada debate

No que atinxe á mecánica  de cada debate, será o/a coordinador/a de cada equipo quen lle presente a folla de composición do equipo de debate á presidencia do xurado ao tempo que se presenta ao público. A continuación, farase o sorteo das posturas a favor e en contra entre os dous equipos do debate correspondente. Tras uns minutos de cortesía para a organización dos equipos iníciase o debate de acordo co seguinte regulamento: comeza o debate o equipo que defende a postura a favor cunha exposición inicial de 5 minutos, e despois tócalle ao equipo que defende a idea contraria, co mesmo tempo de exposición. Cada conxunto de debate terá, a continuación, tres quendas de intervención tamén de 5 minutos cada unha, incluída unha a modo de conclusión de soamente 3 minutos de duración. Pecha o debate o equipo que defende a postura a favor. A duración total de cada debate será, pois, de 36 minutos.

Respecto aos membros do xurado, este estará formado por Rosana Freire Calviño ,  profesora de Filosofía do IES Punta Candieira (Cedeira), Sara Pino Ramos, técnica do SNL da Universidade da Coruña- Campus de Ferrol , Mª Adela Pita Permuy , técnica de normalización lingüística do Concello de Narón,  Miguel Toval  Porta, editor, Edicións Embora e Carlos Miragaya  , director de Diario de Ferrol