Nova campaña de educación viaria para nenos e nenas coruñeses en colaboración con Stop Accidentes

O tenente de alcalde de Seguridade e Mobilidade, Julio Flores, acompañado pola responsable de Tráfico, Begoña Freire, e a delegada de Stop Accidentes, Jeanne Picard, presentou esta mañá unha nova campaña de concienciación sobre educación viaria: “Nesta nova campaña centrada en estacionamentos indebidos teremos como aliados aos máis pequenos, que se converterán por uns días en policías locais que avisarán aos condutores das posibles infraccións que cometan”, avanzou Freire.

Tal e como explicou a concelleira, nesta iniciativa participarán os escolares da Asociación de nenos e nenas camiñantes da Coruña (ANCAS) que utilizan o camiño escolar do centro Concepción Arenal, xunto cos seus monitores e voluntarios de Stop Accidentes. “Estes axudantes da policía local levarán uns cartóns que simulan unha multa nas que marcarán a norma que o infractor incumpra. Trátase de sensibilizar aos cidadáns sobre a necesidade de respectar as normas de circulación e tráfico, co fin de evitar trastornos aos usuarios máis vulnerables: os peóns”.

Freire lembrou que aparcar nas beirarrúas, en vaos ou ramplas peonís obstaculiza e impide que as persoas poidan transitar de forma segura; aparcar en dobre fila próximo ou encima de paso de peóns é unha conduta insolidaria que impide a visibilidade de peóns e condutores e pode provocar atropelos e accidentes; e aparcar en zonas destinadas a outros usuarios como carga e descarga,  persoas con mobilidade reducida ou motos, dificulta o dereito doutras persoas a utilizar estes espazos reservados.

“Esta campaña, que se celebrará desde o luns 17 de marzo até finais de mes, tamén ten como obxectivo lograr espazos seguros de mobilidade para peóns; mellorar o coñecemento sobre a accidentalidade dos peóns e a súa mobilidade; e facer chegar a peóns e condutores a responsabilidade do seu dereitos pero tamén das súas obrigacións: respectar aos demais usuarios da vía pública porque todos somos peóns e condutores”, asegurou a concelleira e engadiu: “Implicando aos nenos e nenas nesta tarefa colaboramos na súa formación para que se convertan en usuarios responsables e tamén os convertemos na voz da conciencia dos adultos”.

Esta nova iniciativa enmárcase dentro das campañas de concienciación e sensibilización que contempla o PMUS e que foi unha das demandas máis repetidas por cidadáns e colectivos que participaron na súa elaboración. “O 34,5% das denuncias efectuadas pola o Policía Local correspóndense coa realización de estacionamentos indebidos, polo que se expoñen campañas divulgativas que incidan nas consecuencias negativas de non cumprir as normas de tráfico, como a maior lentitude do transporte público e as situacións de risco tanto para peóns como para usuarios de bus ou doutros vehículos”, sinalou Freire. 

CAMPAÑA ESPECIAL DA POLICÍA LOCAL

Doutra banda, Flores informou os resultados da primeira campaña especial de control de estacionamentos indebidos en zonas reservadas, que tivo por obxectivo concienciar aos cidadáns da necesidade de respectar as normas de circulación e previr malos hábitos que afectan a catro tipos de infraccións: zonas reservadas a paradas de autobús, zonas de estacionamento de motocicletas, zonas de carga e descarga, así como prazas reservadas a persoas con diversidade funcional e mobilidade reducida.

Esta campaña, desenvolvida do 27 de xaneiro ao 24 de febreiro, finalizou con 928 vehículos sancionados por estacionamento indebido, o que supón triplicar a cifra do mesmo período do ano anterior. Do total de vehículos sancionados, a Policía local considerou necesario retirar 145 co guindastre debido a que causaban un trastorno importante nestas zonas de estacionamento reservado.

Da análise por tipo de zona reservada pódese comprobar como se incrementaron de forma significativa as infraccións en zonas reservadas a carga e descarga (428 en 2014, fronte a 99 en 2013), en paradas de bus urbano (372 en 2014, fronte a 137 en 2013) e en zonas reservadas para aparcadoiro de motos (56 en 2014, fronte a 1 en 2013). Polo que respecta ás zonas reservadas a discapacitados, o nivel de incumprimento detectado pola Policía local foi menor que no resto de zonas reservadas (72 en 2014, fronte a 43 en 2013).

“Non son bos datos porque é evidente que o que se busca é que cada vez haxa menos sancións” indicou Flores, que sinalou que “si analizamos os niveis de intensidade de tráfico urbano, pódese concluír que a maioría dos condutores son respectuosos coas normas de circulación, pero aínda hai un longo camiño por percorrer para lograr a concienciación de todos os condutores e lograr así a redución do número de sancións. En consecuencia, a vixilancia e control de estacionamentos indebidos nestas zonas reservadas continuará ao longo do ano como tarefa rutineira, tanto no traballo da Unidade de Tráfico como na Policía de Barrio”.

Flores finalizou lembrando que a Policía Local continua colaborando coas campañas especiais da Dirección Xeral de Tráfico, que entre o 10 e 16 de marzo centrarase na vixilancia e control do uso do cinto de seguridade e os sistemas de retención infantil, e continuarase desenvolvendo unha serie de dispositivos propios encamiñados a reforzar o cumprimento das ordenanzas municipais e as normas de circulación. “A Policía local comezará a segunda campaña especial de control de estacionamentos indebidos do 24 de marzo ao 30 de abril e centrará o seu traballo nos estacionamentos indebidos nas esquinas das rúas, a dobre fila próxima aos pasos de peóns, os vehículos que aparcan diante dos colectores de lixo e os que ocupan os illotes afectando á visibilidade de condutores e peóns” indicou.