Negreira anuncia que se pechou a “folla de ruta” para a publicación do concurso da Fábrica de Armas

O alcalde da Coruña, Carlos Negreira, reuniuse esta mañá co comité de empresa da Fábrica de Armas para trasladarlles unha mensaxe de tranquilidade e de compromiso por parte das administracións.

Carlos Negreira explicou que os traballadores, tras coñecer a “folla de ruta” que garante o futuro da factoría, abandonarán mañá o peche que mantiveron nas instalacións, unha condición solicitada polo Ministerio de Defensa para poder asinar o acto de devolución dos terreos por parte de Xeneral Dynamics e a posterior publicación no Boletín Oficial do Estado (BOE) do concurso público que permitirá contar cun proxecto viable que dea unha nova oportunidade a Pedralonga.

“Transmitín aos traballadores unha mensaxe de tranquilidade do Ministerio de Defensa, que culminou todas as actuacións necesarias para a devolución dos terreos por parte de Xeneral Dynamics. Xa se cumpren todas as condicións para sacar a concurso público o proxecto que concederá unha esperanza económica aos terreos da Fábrica de Armas”, destacou o alcalde, quen agradeceu o clima de “colaboración e entendemento” que demostraron os traballadores para abandonar as instalacións e permitir que continúe o proceso.

Carlos Negreira explicou que, unha vez abandonen mañá a Fábrica de Armas, nas 72 horas seguintes asinarase a acta de devolución dos terreos e, cumprido este trámite, nun prazo dunha semana o Ministerio de Defensa comprometeuse a remitir ao BOE o concurso público.

“Foi moi importante fixar esta folla de ruta, esta conta atrás que permite que teñamos a esperanza de que eses metros cadrados da parcela sexan unha oportunidade industrial e económica. Si non fósemos capaces de chegar até aquí, agora non teriamos esta oportunidade que se materializa”, asegurou o alcalde, quen aproveitou para subliñar o entendemento e a total predisposición ao diálogo que demostraron o tres administracións (Ministerio de Defensa, Xunta e Concello) e os traballadores.

O presidente do comité de empresa da Fábrica de Armas, Roberto Teixido, asegurou que a noticia avanzada polo alcalde é positiva para o futuro da factoría, á vez que lle agradeceu o apoio demostrado aos traballadores “desde o principio”.