Neda acollerá o Campus Unoy13 de Porteiros que promove a Escola Imanol Etxeberría

Neda acollerá o Campus Unoy13 de Porteiros, impartido pola escola do mesmo nome, unha das máis prestixiosas do territorio nacional e cuxa dirección recae no ex gardameta do Athletic de Bilbao Imanol Etxeberría. A elección da vila para desenvolver o campus non é aleatoria, xa que se tivo en conta o enorme potencial existente na comarca. Desenvolverase entre os días 14 e 16 de abril no Campo Municipal de Fútbol Juanito González en horario matinal (de 9,30 a 14 horas) e na actividade colabora o Concello de Neda a través da súa Concellaría de Deportes.

Durante ese tres días, porteiros e porteiras de entre 6 e 18 anos adestrarán e aprenderán de monitores titulados nesta especialidade todas as claves desta posición. O custo da actividade é de 105 euros e a inscrición está xa aberta na web www.unoy13.com. O importe inclúe os adestramentos, merenda, sudadera e seguro de lesións. Ademais, desde a organización infórmase da existencia de códigos de desconto de 10 euros tanto en redes sociais como nos flyers que se repartirán pola comarca.

Por último, sinalar que o obxectivo do Campus pasa por lograr que nenos e nenas gocen desta experiencia deportiva, aprendan un pouco máis sobre este posto e adquiran valores de compañeirismo, solidariedade, traballo en equipo, sacrificio e esforzo.