‘Na flor da pel’. Mostra sobre os pergameos na Biblioteca de Verín

O vindeiro luns 10 de marzo, ás 19.30 horas, terá lugar a inauguración de ‘Na flor da pel’, unha exposición sobre pergameos, a cargo da escritora e profesora Fátima Braña Rey e Francisco Luis Fariña Busto, que é o presidente da Xunta Rectora do Museo do Pobo Galego do que foi membro fundador ademais de académico correspondente da Real Academia da Historia e membro do Consello da Cultura Galega.

Esta exposición, do Museo do Pobo Galego, estará na Biblioteca Pública Municipal de Verín entre o 10 e 21 de marzo. A mesma ven determinada polo material, o pergameo, a pel de animal que, debidamente tratada, se utiliza como materia e scri ptórea. Seguindo unha orde cronolóxica, móstrase a ampla variedade temática: bulas, documentos de compravenda, testamentos, partituras musicais, entre outros, e os diferentes formatos: desde documentos pequenos que aproveitan ao máximo o material ata a utilización completa da pel do animal. Tamén pode comprobarse como o uso de este soporte se prolonga no tempo, entre os séculos XII e XX.

Devandita exposición documental, que está acompañadas por unha serie de paneis que subliñan a importancia do pergameo a través da historia, forma parte do acervo documental do Museo, conformado grazas aos depósitos e doazóns que pouco a pouco foi recibindo, sendo ao mesmo tempo unha mostra de sensibilidade dos autores desas contribucións cara ao patrimonio cultural do noso país. A mesma poderá visitarse no horario de apertura ao público da Biblioteca de Verín: de 10 a 13.30 e de 17 a 20 horas.