Máis de 80 menores con idades están anotados nos obrairos do novo programa de igualdade “Ferrol Concilia”

Un total de 82 nenos/as da cidade con idades comprendidas entre os 3 e 12 anos están anotados até a data para participar na proposta de actividades formativas e lúdicas do novo programa “Ferrol Concilia”, posto en marcha pola Concellería de Igualdade e Xuventude do Concello de Ferrol, que dirixe Verónica Casal Míguez. A edil ferrolán lembrou que esta iniciativa permite “dispoñer dun lugar complementario á escola é á familia, onde estas poden deixar os seus menores para que participen en obradoiros lúdicos e de aprendizaxe, mentres realizan as súas actividades laborais e persoais diarias”.

O programa “Ferrol Concilia” comeza esta mesma tarde con dous obradoiros dirixidos a nenos/as con idades de 3 a 6 anos que levan por título “Predeporte” e “Pequenos Talentos”, enfocado ao debuxo e a pintura. Estas actividades teñen unha hora de duración –das 16.00 ás 17.00 horas, o primeiro; e das 17.00 horas ás 18.00 horas, o segundo- e teñen lugar na Casa da Muller. O “Ferrol Concilia” consta dun total de 14 obradoiros, todos eles gratuítos, que se desenvolverán de luns a sábado dende este mes de febreiro até o vindeiro de outubro. Inicialmente terán como lugar de celebración as depenndencias municipais Casa da Muller, situada na rúa Lugo, para trasladarse ao novo espazo infantil cuberto da praza de España tan pronto como estea dispoñible.

En canto aos talleres, a proposta inclúe unha gran variedade de obradoiros, que son os seguintes: obradoiro dos sentidos “Vexo vexo”, que consiste en coñecer a través dos sentidos o ámbito físico e social máis próximo aos menores; obradoiro de “Chiquirritmo”, que pretende desenvolver a memoria auditiva e a capacidade rítmica; taller “Cores”, para favorecer a creatividade e a imaxinación dos menores así como o desenvolvemento da comunicación verbal e non verbal a través das artes plásticas; taller de contos e animación á lectura “Érase unha vez”,que pretende iniciar aos menores no mundo do libro e das bibliotecas; obradoiro de apoio escolar ao estudo asistido “Aula Studio”, que consistirá en mellorar e asentar o rendemento escolar dos participantes; obradoiro de inglés “Bilingual”,  para afianzar os coñecementos de inglés e ampliar o vocabulario e a fluidez verbal; taller de predeporte “Salta, saltarín”, que consiste en dar a coñecer os deportes tradicionais e mellora a súa motricidade e control corporal; taller de debuxo e pintura “Pequenos talentos”, para descubrir e valorar as capacidades artísticas; taller de “Música  maestro”, que permitirá despertar un interese pola música e o seu mundo; obradoiro de costura creativa “Dedais”, para aprender a coser a man e máquina, e iniciarse no mundo do crochet e patchwork; obradoiro de cociña fácil “Petit Chefs”, para estimular o interese pola comida sa e o mundo da cociña; e o obradoiro multideporte “Pasa a bola”, que consistirá na práctica dun deporte en equipo como elemento de relación e desenvolvemento. Así mesmo, os menores de entre 10 e 12 anos, poderán participar no taller de cine e videocreación “Rodando” e no taller de radio “Radio Chiquitín”.