Liberdade con cargos para os tres detidos nas protestas da flota do cerco

Os tres manifestantes detidos este martes como consecuencia dos enfrontamentos rexistrados cos antidisturbios no marco da protesta da flota do cerco en Santiago de Compostela quedaron en liberdade con cargos.

Segundo confirmaron fontes da Delegación do Goberno, os tres detidos prestaron declaración na tarde deste martes en dependencias policiais e, posteriormente, quedaron en liberdade con cargos.

A manifestación da flota do cerco convocada este martes en Santiago concluíu con cargas policiais para dispersar os manifestantes que, tras completar a súa manifestación entre o Obradoiro e a Xunta dirixíronse ao Parlamento de Galicia. A Delegación do Goberno sinalou que esta segunda parte da mobilización “era ilegal” por non ser comunicada previamente.

Neste sentido, a Delegación do Goberno puntualizou que o percorrido realizado entre a Xunta e o Parlamento de Galicia “non estaba comunicado” e “no mesmo horario” coincidiu con outras dúas manifestacións diante da Cámara que “si” foran comunicadas.

“A Policía ten que permitir o dereito dos cidadáns a exercer o seu dereito a manifestación dos que si o comunicaron e que se desenvolva con normalidade e seguridade”, defende a Delegación do Goberno.