“Laranxus 7” ensina o valor da amizade aos cativos de Mos

A concellería de Educación e Participación Cidadá que dirixe a edil Kely Monzón organiza “Laranxus 7”, un espectáculo de títeres enmarcado dentro do programa “Ocio en Familia”.

Laranxus 7, planeta no que habita un extraterrestre chamado Verde, é invadido por uns malvados invasores, polo que Verde deberá embarcarse nunha fantástica viaxe na procura de axuda. A súa travesía levarao a coñecer distintos lugares e razas do universo que acabarán por cambiarlle a súa visión do mundo e a descubrir o verdadeiro valor da amizade.

Este espectáculo, que será gratuíto para todos os asistentes, tratará temas como a ecoloxía, a tolerancia, a amizade e a solidariedade, e vai dirixido ás familias con cativos con idades comprendidas entre os 3 e os 12 anos.

O obxectivo desta actividade é o de incentivar a participación e o divertimento das familias mosenses, así como mellorar e aumentar os momentos de lecer compartidos entre os membros da unidade familiar, e desta forma tamén propiciar a interactuación e o contacto entre as diferentes familias do municipio.

O espectáculo de títeres levarase a cabo no centro Multiusos das Pozas de Mos, o vindeiro domingo 30 de marzo ás 18:00 horas.