Gran final de festas no Carballiño con máis de 200 músicos para animar a Cachucha e o desfile de Entroido

Aínda que o principal protagonista deste domingo no Carballiño vai ser o cocido de cachucha, que se vai a servir nos 20 restaurantes da vila do Orcellón para centos de comensais, o condimento perfecto para esta comida vai ser a música, interpretada por máis 200 músicos que, desde as 12:00 horas, percorrerán as rúas do Carballiño.

Entre as agrupacións que actuarán durante esta xornada están Castro Belo, Madialeva, Air Jalisia e Doutor Anchoa.  Tampouco faltarán os sons máis tradicionais interpretados pola Banda de Gaitas do Carballiño, nin o ritmo carnavalesco do folión As Maceiras, A Caniceira e A Lardeira.

A tarde do domingo de Piñata no Carballiño animarase desde as 18:00 horas co gran desfile de Entroido, onde participarán unhas 15 agrupacións, xa que algunhas se apuntaron a última hora e fóra de concurso, ao decatarse que se celebraría este domingo.

Por último o fin de festa correrá a cargo da orquestra Ledicia, na Praza Maior do Carballiño, tras o fallo do xurado do concurso de entroido organizado pola área de Cultura entre as agrupacións participantes no desfile.