Funergal érguese como única cita internacional do sector funerario na Península en 2014

Fomentar o negocio e a competitividade das empresas españolas a nivel internacional. Estes son os obxectivos principais definidos esta mañá en Expourense polo comité asesor de FUNERGAL, a Feira Internacional de Produtos e Servizos Funerarios, celebrarase no recinto feiral ourensán os días 7 e 8 de novembro. Esta cita ratificou a súa condición de ‘Feira Comercial Internacional’ outorgada pola Secretaría de Comercio Exterior do Ministerio de Economía e Competitividade do Goberno de España. A 8ª edición de FUNERGAL convértese así na única cita internacional do sector funerario celebrada na Península no ano 2014. Trátase dun evento exclusivamente profesional, convertido xa nunha referencia, tanto en asistencia como en cifras de negocio.

Para favorecer a internacionalización das empresas, a Cámara de Comercio de Ourense volverá organizar unha misión comercial inversa con potenciais importadores cuxos países de orixe serán determinados polo propio comité asesor. Durante esta primeira reunión lembráronse os datos de satisfacción recollidos na última edición. Os bos resultados obtidos, cun 90% de expositores e un 93% de expositores con intención de repetir a súa presenza en FUNERGAL, levaron a que as expectativas para a próxima cita sexan moi positivas, dado o interese mostrado polas empresas do sector.

Esta feira supón a creación dunha área de negocio que facilita a presentación de produtos ante profesionais chegados de toda a xeografía peninsular e europea e, ao mesmo tempo ofrece a posibilidade de establecer potenciais contactos entre fabricantes e provedores. Esta cita de negocios é xa todo un referente para os funerarios de España e Portugal.

Outro dos obxectivos de FUNERGAL será actualización dos profesionais do sector a través dun completo programa de Xornadas Técnicas. O comité asesor xa apuntou os temas de maior interese como poden ser a subida do IVE, a competencia entre prestadores de servizos funerarios, as novas técnicas de conservación, mercadotecnia emocional personalizado e temas relacionados co uso de redes sociais ou a sustentabilidade e o medio ambiente.

Promoción internacional

Durante esta reunión, informouse da promoción internacional de FUNERGAL en Tanexpo de Bolonia, a principal feira mundial do primeiro semestre do ano. Alí contou cunha caseta que foi visitado por profesionais de España, Portugal, Italia, Brasil, Polonia, Estados Unidos ou China, entre outros países.

E é que desde que adquiriu o carácter de cita de internacional en 2012, Funergal foi tecendo unha rede de convenios de colaboración coas principais feiras mundiais do sector que implica a promoción mutua en ambas as citas. Ademais de Tanexpo, estivo a promocionar a súa edición de 2014 en Expofuneraria en Querétaro (México) e mantén convenios con outras citas como a feira da National Funeral Directors Association (NFDA) nos Estados Unidos ou con Necropexpo de Polonia que celebrarán a súa próxima edición en 2015.

Comité Asesor

O comité asesor de Funergal está integrado polos principais axentes sociais implicados no sector, desde a Administración, a través da presenza da Consellería de Sanidade da Xunta de Galicia, entidades como a Cámara de Comercio de Ourense, medios de comunicación especializados como a Guía Funeraria e os representantes das principais asociacións sectoriais de España e Portugal (Asociación de Empresarios de Funerarias de Ourense, Associaçao dos Agentes Funerarios de Portugal, Federación Gallega de Servicios Funerarios, Asociación Gallega de Empresas de Servicios Funerarios-AGESEF, Asociación Nacional de Servicios Funerarios-PANASEF, Asociación de Funerarias de España- AFUES, Asociación de Entidades y Empresas Municipales de Servicios Funerarios y de Cementerios- AFCM, Asociación Nacional de Tanatopraxia y la Associaçao das Industrias de Madeira e Mobiliario de Portugal – AIMMP), así como de grupos empresariais destacados como é o caso de Mémora ou Funespaña.