Ferrol adxudica as obras de mellora do centro Torrente Ballester

O alcalde de Ferrol, Jose Manuel Rey Varela, informou hoxe da contratación das obras de mellora do Centro Torrente Ballester, un dos equipamentos culturais de referencia en Galicia. A empresa Civis Global S.L. ocuparase de levar a cabo esta intervención, que inclúe tamén a posta en valor do axardinamento exterior destas instalacións municipais. A Xunta de Goberno Local da Administración ferrolá, reunida esta mañá, acordou hoxe a devandita adxudicación por un importe total de 196.258,37 euros (21% de IVE incluído) e un prazo de execución de catro meses, a contar a partir da firma do contrato e da acta de reformulo.

No financiamento desta intervención, o Concello de Ferrol conta coa colaboración da Deputación da Coruña, que achega o 80% do orzamento total necesario para executar as obras. Así o acordaron en novembro do ano pasado o alcalde da cidade, Rey Varela, e o presidente provincial, Diego Calvo, que na data antes sinalada asinaban un convenio de colaboración polo que a institución provincial contribúe a facer posible a mellora do que é “un centro de importancia capital na actividade cultural da cidade e da comarca”, dixo o rexedor municipal.

No que atinxe ás obras a levar a cabo, estas permitirán a recuperación da parcela posterior para uso público e da cuberta do patio central, a impermeabilización dos lucernarios e outras reparacións. Así, rehabilitaranse os antigos muros de peche das propiedades lindeiras, axudando deste xeito a recuperar parte do carácter histórico da zona.  Segundo se contempla no proxecto de obra, para a mellora do pavimento exterior utilizarase pedra de Santiago con céspede na senda central, á vez que se instalarán bancos de pedra e procederase ao pintado da parte posterior do centro. Dentro desta mesma actuación, mellorarase a accesibilidade ao recinto e pecharase a parcela con dous pantalóns de acabado en forza. Por último, os traballos contemplan o desenvolvemento da rede de evacuación de augas pluviais da cuberta do edificio do centro e a limpeza dos muros e a súa reconstrución.

Así as cousas, esta intervención mellorará a imaxe e disposición de espazos no Centro Torrente Ballester, posto que se recuperará o axardinamento posterior para uso público; e ademais dignificará e porá en valor o contorno no que se insire esta infraestrutura municipal