En liberdade sen cargos o mozo ourensano detido nas Marchas da Dignidade en Madrid

O xoven ourensano de 18 anos detido o sábado nas Marchas da Dignidade en Madrid quedou este luns en liberdade sen cargos tras pasar a disposición xudicial na capital madrileña.

Así o confirmou o pai do mozo, Emilio Cao, quen explicou que se celebrou un xuízo rápido este luns en Madrid e “saíu ben librado”. “Podía ser peor”, apostilou.

O pai de Emilio David Cao, de 18 anos sen antecedentes, comentou que, tras conseguir falar co seu fillo pasadas as 17,00 horas, este lle confirmou que quedou libre sen cargos porque “non puideron probar nada”. “Non ten nin unha rabuñadura e non lle deu a ninguén”, comentou, para engadir que “non tivo tempo de escapar e o colleron no medio”.

Ademais, sinalou que o seu fillo se queixou do “mal” trato que lles deron, “como no terceiro mundo”. “Tratáronlles como delincuentes”, sostivo, para explicar que lle transmitiu que, entre outros aspectos, lles deixaron “a luz acendida para que non durmisen”.

Tras saber que o rapaz quedou en liberdade, a súa familia sinalou que non pretende que “cambie os seus ideais”. “Démoslle a mellor educación que puidemos”, sostivo o seu pai. “Considero que é algo que fai por moverse cando lle estrullan o colo a un”, concluíu.

DETENCIÓNS

Amigos do mozo detido e membros do Círculo Podemos de Ourense comunicaran que o arresto de Emilio David Cao se produciu cara ás 20,30 horas do sábado nas primeiras cargas que tiveron lugar nos disturbios producidos na madrileña rúa Génova.

Os detidos o sábado durante as Marchas da Dignidade empezaron a pasar a disposición xudicial ás 11.30 horas deste luns. Concretamente, trátase de 21 arrestados maiores de idade. Os tres restantes, de menos de 18 anos, despois de ser trasladados ao Grupo de Menores da Policía (Grume) foron enviados á casa con cargos á espera de ser xulgados no Xulgado de Menores.