Dez comparsas participarán na gala do Entroido 2014 do Concello de Ferrol

Un total de dez comparsas participarán no tradicional festival de Entroido organizado polo Concello de Ferrol, que terá lugar mañá martes a partir das 20.00 horas na Praza de Amboage. As actuacións das devanditas agrupacións desenvolveranse baixo unha carpa instalada pola Concellería de Festas co obxectivo de que as posibles condicións climáticas adversas non desanimen á xente a gozar dos disfraces e músicas do entroido ferrolán.

Así, as dez comparsas que se darán cita en Ferrol son: Os parrandolos, A canteira, Os colludos, A revolta de Trasancos, Os argalleiros, Os xunquiños, Río Belelle, Os trastos, Tróupele e Piratas. De maneira previa á gala e se as condicións meteorolóxicas o permiten, terá lugar un desfile que partirá ás 18.00 horas da praza de España e que percorrerá as principais rúas do centro da cidade até Amboage. A Concellería de Festas repartirá este entroido 700 euros en premios aos mellores disfraces na categoría individual ou parellas e en grupos.

Ademais, os festexos continuarán o vindeiro venres, día 7, co tradicional enterro da sardiña, en Ultramar. A Administración municipal colabora coa entidade veciñal de devandito barrio na organización deste evento, que dará comezo ás 20.30 horas. Así mesmo, durante esa mesa xornada do día 7 terá lugar as 17.30 horas unha festa infantil na praza de Ultramar, cun concurso de disfraces; e ás 20.15 horas realizarase un desfile de comparsas polo barrio.