Deteñen a dous presuntos ladróns por roubo con forza en Vigo

Axentes do Corpo Nacional de Policía da Comisaría de Vigo detiveron a dous veciños da cidade, de 26 e 43 anos de idade respectivamente, como presuntos autores dun roubo con forza.

Segundo informaron fontes policiais, os feitos tiveron lugar na madrugada do domingo, cando un veciño dun edificio da rúa A Guarda, que accedía ao garaxe, sorprendeu a dous individuos fuxindo á carreira cunha bicicleta.

Tras alertar á Policía, despregouse un dispositivo de procura e unha dotación localizou a dous sospeitosos na zona do parque da Bouza. Os dous individuos trataban de ocultarse tras un muro e quixeron escapar, pero foron interceptados.

Nun cacheo superficial, os axentes atopáronlles varios efectos para a comisión de delitos, e tamén localizaron a bicicleta roubada nas proximidades.

Mentres, outros axentes entrevistáronse cos veciños do edificio, quen explicaron que escoitaran ruídos procedentes dos trasteiros. A Policía comprobou que o acceso a estes trasteiros fora forzado, e que tamén había varias portas de adegas rotas ou desencaixadas.

Por estes feitos, trasladouse aos dous sospeitosos a dependencias policiais, onde se comprobou que o máis novo ten 23 antecedentes, e o maior, 77 antecedentes. As actuacións pasaron a disposición do Xulgado de Instrución número 7 de Vigo.