Crece o ritmo de venda de entradas para o encontro do Celta co Atlético de Madrid

O ritmo de venda de entradas para o ante o Atlético de Madrid (sábado, 20.00 horas) continúa crecendo. Os afeccionados celestes acudiron hoxe en bo número ás oficinas de abonados do club para adquirir billetes para este importante encontro e xa están a piques de esgotarse as bancadas de Gol e, especialmente, Marcador.

A importancia do partido para un Real Club Celta que busca avanzar cara á permanencia, e o gran atractivo do rival, tradúcense nunha gran actividade nas oficinas de abonados do club, onde se despacharon xa máis de 1.300 entradas para este choque.

A afección celeste é consciente de que o seu alento é fundamental para alcanzar o obxectivo final e unha vez máis está a responder de maneira espléndida para sumarse ao incondicional e exemplar apoio que ofrecen sempre os abonados célticos.

O club mantén para este apaixonante e esixente encontro os prezos habituais e, ademais, como agradecemento á fidelidade dos abonados, este partido non foi designado como ‘Día do Club’.

Os seguidores Sub-24 poden comprar billetes por un prezo que oscila entre os  15 e 25 euros, mentres que os adultos  poden adquirir entradas desde 25 e até 50 euros. As entradas estarán á venda na oficina de abonados de luns a venres en horario de 10 a 14 e de 17 a 20 horas, mentres que o despacho de billetes virtual (www.celtavigo.org/taquillaCelta) permanece operativa as 24 horas do día.