Comeza a primeira xornada de portas abertas nas tendas pop-up para difundir os proxectos Urbana C

As empresas que desenvolven os catro programas do plan Urbana-C para o Agra do Orzán -Tendas a Exame, Tendas pop-up, Escola de Emprendemento e Aula de Emprego- organizarán a súa primeira xornada de portas abertas para que comerciantes, veciños, asociacións e todas as persoas que desexen participar ou coñecer as actividades deseñadas para reactivar o barrio poidan facelo durante un acto no que se explicarán de forma detallada este catro iniciativas impulsadas desde o Concello a través da área de Emprego e Empresa que dirixe Luisa Cid.

A xornada celebrarase o mércores, 26 de marzo, entre as 20.30 e 21.30 horas, na tenda pop-up do número 58 da rúa Barcelona e durante a xornada haberá degustacións de produtos e actividades de animación baseadas nas iniciativas de emprendimiento e comercio do Agra do Orzán.

PROXECTOS EMPRESARIAIS EN TRES MINUTOS

A Escola de Emprendedores aproveitará a xornada para organizar a I Edición da Feira Elevator Pitch na que un grupo de emprendedores terá que explicar en tres minutos a un xurado de expertos os seus proxectos empresariais. Entre os proxectos hai desde un serradoiro até unha tapería e un negocio de cervexa artesanal. O concurso Elevator Pitch celebrarase de 11.45 a 13.15 horas.

A actividade organizada pola Escola de Emprendedores inclúe unha mesa redonda sobre microinversiones na que se abordarán temas como as redes de investidores e a figura dos Bussiness Angels, entre outras accións. A feira Elevator Pitch  terá un horario moi amplo: comezará pola mañá, ás 9.30 horas, e prolongarase de forma ininterrompida até as 20.00 horas con sesións de contacontos e degustacións gratuítas. As persoas interesadas poden obter toda a información no número de teléfono 981 185 037 ou en www.emprendedorescoruna.es .

Fomentar a apertura de comercios, as iniciativas de autoemprego e de emprendimiento e deseñar itinerarios personalizados para facilitar a procura de traballo son os principais obxectivos dos programas impulsados pola área de Emprego e Empresa dentro do programa Urbana-C para o Agra do Orzán. Tendas a Exame, Tendas pop-up, Escola de Emprendedores e Aula de Emprego son financiados nun 80% pola UE a través de fondos Feder, mentres que o Concello achega o 20% restante.