Carlos Negreira destaca que Adolfo Suárez foi “un exemplo de entender a política”

O alcalde da Coruña, Carlos Negreira, expresou esta mañá a súa pesar polo falecemento de Adolfo Suárez. O rexedor, que reiterou as súas condolencias aos seus familiares, amigos e compañeiros, quixo destacar o carácter de diálogo e consenso do expresidente do Goberno: “Adolfo Suárez foi unha persoa esencialmente boa que se vai pero que nos deixa o seu exemplo de saber facer e de entender a política desde uns parámetros que todos deberiamos de tentar recuperar: amplitude de miras, diálogo, consenso e, por encima de todo, xenerosidade”, destacou Negreira.

Neste sentido, o alcalde lembrou un dos feitos históricos que o primeiro presidente da democracia viviu na cidade: “A Coruña foi protagonista dese espírito de consenso que Suárez tivo desde o primeiro momento. Quero lembrar que tan só 27 días despois de tomar posesión como presidente do Goberno a cidade acolleu un dos Consellos de Ministros máis importantes da historia de España: o que se bautizou como Consello da Amnistía, que tiña como obxectivo promover a reconciliación de todos os cidadáns de España”, destacou Negreira, quen explicou que a través do Real Decreto fimado na cidade concedéuselle a amnistía política a máis de 400 presos políticos e 25.000 presos comúns: “Este Consello de Ministros, que tamén supuxo a primeira visita dos Reyes de España á cidade despois do seu nomeamento, foi un exemplo da procura dese consenso e reconciliación de todos os españois para construír un futuro común e non dividido en dous Españas como herdaramos da historia”.

Negreira tamén quixo lembrar os lazos familiares que unían ao expresidente coa cidade: “Adolfo Suárez sempre estará no noso recordo. Estamos orgullosos dunha persoa que tivo unha traxectoria vital tan próxima á nosa, que sempre sentiu as cores da cidade e vibrou cando A Coruña viviu momentos de prosperidade e éxito. Así foi sempre porque comparte a súa historia vital coa da urbe herculina, á fin e ao cabo, aquí estan enterrados, no noso querido cemiterio de San Amaro, os seus avós e o seu pai”, concluíu.