Cancoruña e Concello colaboran na organización de dous cursos de comportamento canino

O Concello da Coruña, a través da Concellaría de Medio Ambiente que dirixe Enrique Salvador, informa de que o fin de semana do sábado 29 e o domingo 30 de marzo colabora con Cancoruña na celebración de dous cursos de comportamento canino dirixidos a veterinarios e propietarios.

En concreto, o sábado 29 de marzo, celebrarase a III Xornada de Medicamento do Comportamento para veterinarios, na que expertos da talla de Marta Amat, Tomás Camps, Ángela González e Patricia Pazo abordarán casos de problemas de comportamento, condutas destrutivas, problemas médicos que orixinan modificacións de conduta, eliminacións inadecuadas no can ou a influencia da nutrición no comportamento.

Por outra banda, o domingo 30 de marzo, organizarase o Curso avanzado de comportamento canino para propietarios, coa participación de Marta Amat, Javier Astorga, Ángela González, Patricia Pazo e Octavio Villazala. Entre outras cuestións, tratarán as desfeitas dos cans, os típicos tópicos, os erros máis frecuentes que se cometen na educación do can, a necesidade de observar para comprender á mascota, e a importancia do binomio nutrición-saúde.

Os interesados en inscribirse nestes cursos poden facelo a través da web www.cancoruna.jimdo.com e www.cancorunavet.jimdo.com. Con esta nova colaboración con Cancoruña, o Concello continúa abordando a problemática dos cans nas cidades tratando de concienciar aos veciños sobre a necesidade de cumprir a ordenanza municipal de protección e tenencia de animais de compañía, así como sobre a utilización de áreas caninas ou o fomento da adopción de cans procedentes tanto da canceira municipal como doutros refuxios.