Búscase a un veciño de Cangas cuxo coche leva varios días abandonado na Costa da Vela

A Garda Civil de Cangas (Pontevedra) busca a un home de 36 anos, veciño da localidade pontevedresa, cuxo coche levaba varios días aparcado no mesmo lugar, na Costa da Vela, e cuxa desaparición foi denunciada este luns polos seus familiares.

Tal e como trasladou a Garda Civil, foron efectivos do Instituto Armado os que localizaron na Costa da Vela un vehículo que “levaba tempo alí”, e que gardaba varias pezas de roupa no seu interior.

Así, identificaron ao titular e puxéronse en contacto coa súa familia, que indicou á Benemérita que “leva uns días sen saber del” e presentou este luns a denuncia pola súa desaparición.

A Garda Civil iniciou, desta forma, a procura por terra, para o que pediron a colaboración de cans de rastrexo da comandancia de Ourense, e por mar.

Segundo informaron fontes de Salvamento Marítimo, para a procura do home por mar mobilizouse o helicóptero Pesca I e a embarcación ‘Salvamar Mirach’, que están a ser coordinadas desde o posto de Vigo desde 12.20 horas deste luns, cando recibiron o aviso da Garda Civil.