Arranca a actividade na Escola deportiva de Surf en Oleiros

O Concello de Oleiros, coñecedor da problemática social que supoñen os ascendentes índices de obesidade infantil e xuvenil, do sedentarismo, e das dificultades que ás veces atopa a nosa mocidade para realizar actividades físicas e deportivas dun xeito regular, pon en marcha a Escola Municipal de Surf dirixida a rapaces e rapazas de entre 12 e 21 anos.

O programa de actividades de surf terá lugar no centro deportivo municipal da praia de Bastiagueiro ata o 27 de xuño coincidindo co calendario escolar. Haberá clases todos os mércores e venres das 16:30 horas a 18:00 horas. O Concello facilitará todo o material necesario como as táboas, os traxes, etc. O prazo de inscrición aínda está aberto xa que queda libre algunha praza. As inscricións poderán realizarse nas oficinas do servizo municipal de deportes. O prezo desta actividade é de 33 euros mensuais para mozos e mozas empadroados e 83 para os non empadroados.