A secretaria de Igualdade destaca en Lalín a importancia das novas oportunidades de emprego para as mulleres rurais

A secretaria de Igualdade nas xornadas en Lalín

A secretaria xeral de Igualdade, Susana López Abella destacou a importancia de potenciar novas oportunidades de emprego para as mulleres rurais, e incidiu no traballo da Administración galega a prol do fomento de novas actividades que permitan unha transformación máis competitiva para o medio rural.

Susana López Abella asistiu hoxe en Lalín ás Xornadas de Inserción Laboral organizadas pola Asociación de Mulleres e Familias do ámbito rural de Galicia (Amfar), onde afirmou que o futuro do medio rural depende en boa medida do papel outorgado ás mulleres, e as asociacións convértense en importantes aliadas para a difusión e posta en marcha de moitos programas deseñados e impulsados dende a Xunta.

A titular de Igualdade destacou o apoio do Goberno galego ás mulleres do medio rural nas accións aparecen recollidas no VI Plan Galego para a Igualdade entre mulleres e homes, polo que é preciso potenciar o desenvolvemento profesional das mulleres rurais en todos os posibles ámbitos da actividade económica.

Finalmente, López Abella considerou coma prioritaria a participación das mulleres nos espazos de poder e toma de decisións do medio rural e o asociacionismo coma unha das ferramentas máis eficaces para conseguilo, polo que tanto organizacións agrarias coma cooperativas e grupos de desenvolvemento rural deben recoller unha presenza en órganos directivos acorde ca realidade das mulleres rurais