Xosé López Orozco denunciará ao fundador de Cechalva

O alcalde de Lugo, o socialista Xosé López Orozco, expresou este luns a súa “decepción” co seu excompañeiro de corporación Francisco Fernández Liñares, a quen cree que “nunca” chegou a coñecer á vista de que é considerado como un dos líderes da Operación Pokémon, na que tamén el está imputado.

A ese respecto, volveu proclamar a súa “inocencia” e avanzou que se querelará contra un dos fundadores de Cechalva, José Luis Álvarez, “tan pronto sexa o momento”. Esta decisión a toma despois de que transcendera que, na súa declaración ante a instrutora do caso, Pilar de Lara, asegurou que pagaba 2.000 euros ao mes ao alcalde pola adxudicación do servizo da grúa.

Malia iso, interpreta que nesta “segunda entrega” do levantamento do sumario da Operación Pokémon se acredita que “non hai probas” contra el e, ao igual que no caso Campeón, no que xa se arquivou a súa imputación, “só hai a palabra dun mentireiro” contra el.

“Non hai probas, as non as pode nin poderá haber, porque nunca recibín ningún tipo de suborno. Nin de forma directa, nin dunha forma indirecta, nin por parte de persoa interposta, nin deixándomo nun muro; nunca”, sentenciou Orozco, que non se cansou de repetir na súa comparecencia ante os medios que non existe “ningunha proba das graves acusacións” das que foi obxecto.

Na mesma liña, insistiu en que é “inocente” e en que nunca o”subornaron de ningunha forma nin ‘farrapos de gaita”‘. “E, por se fose pouco, agora ata hai quen di que non son a quen alcuman ‘O Cura’, engadiu o primeiro edil de Lugo para reforzar as súas afirmacións sobre a súa inocencia.

ACTUACIÓNS CONTRA ÁLVAREZ

Sen deixar de abundar en que é “un cidadán inocente” que se viu “sometido a un linchamento inmoral, máis propio da Inquisición que dunha sociedade democrática polo único feito de ser alcalde de Lugo”, Orozco sostivo que “tan pronto sexa o momento” os seus avogados actuarán contra José Luis Álvarez.

“É que me custa pronunciar o seu nome, pero non me queda máis remedio. Un tal Álvarez, que vostedes, que neste momento están a facer tanto periodismo de investigación, non é máis que poñer en Google o nome deste suxeito e buscar as cousas tan distintas que dixo ao longo do tempo e mesmo no propio sumario”, apuntou, e criticou que este “esconda” as súas acusacións cun dixéronmo”.

Tras ratificarse en que denunciará ao empresario asturiano, fundador, xunto co ovetense Jorge Pio Cecchini, da empresa Cechalva –que xestiona a grúa de Lugo dende 2006–, Orozco declinou varias preguntas sobre o seu futuro e sobre se repetirá como candidato nas eleccións municipais de 2015.

O SEU FUTURO

Se ben ante a maxistrada asegurou que non volvería concorrer, puntualizou que iso foi “en novembro de 2012” e que, dende entón, “choveu”. “Hoxe vou continuar co meu traballo e, neste momento, ademais de servir aos lucenses, como político só teño un obxectivo: que Elena Valenciano gañe as europeas”, resolveu.

Así as cousas, pospuxo calquera decisión ata que pase esta cita coas urnas. “A partir de aí, vólvanme facer a pregunta”, pediu o rexedor de Lugo aos xornalistas.

XUSTIZA “IGUAL PARA TODOS”

Despois de resaltar o que “sufriu” neste tempo polas imputacións que acumula –suborno e tráfico de influencias–, opinou que o que hai contra el é “fundamentalmente, declaracións de imputados”.

“Se saíse isto o día que saíu o primeiro fascículo da apertura do sumario, este sufrimento fose menor”, sinalou Orozco, quen pediu que a Xustiza sexa “igual para todos” e tamén se pregunte ao presidente do PP de Lugo, José Manuel Barreiro, “polo que aparece aí”.

E é que, como recordou, Barreiro aparece nos papeis alcumado ‘Chino’ e o propio encargado de Doal –filial do grupo Vendex e concesionaria da ORA en Lugo–, Javier Reguera, admitiu ante Pilar de Lara que se contratou un traballador por “enchufe” do voceiro dos populares no Senado.

Finalmente, Orozco expresou que se levou “unha decepción moi grande, moi grande” ao saber que Liñares –como recoñeceu ante a xuíza– percibía pagamentos de 1.500 euros mensuais da empresa asturiana Cechalva e outros 1.000 euros do Grupo Vendex. “A esa persoa non a coñecín nunca”, sentenciou.