Varios axentes realizan un rexistro nas oficinas da construtora Eiriña en Pontevedra

Axentes da Policía Nacional desenvolven esta tarde un rexistro na sede que a empresa construtora Eiriña ten na cidade de Pontevedra, no marco da Operación Patos, que coordina o xulgado de instrución número sete de Vigo e que investiga delitos de prevaricación, suborno e tráfico de influencias na adxudicación de contratos públicos.

A entrada da sede de Eiriña, situada na Praza 8 de Marzo, esquina con Eduardo Pondal, permanece custodiada por dous axentes uniformados, mentres que no interior se solicita información relacionada coa operación na que xa foron detidas cinco persoas, aínda que permanece aberta.

En varios dos seis concellos e diversos organismos públicos nos que se practicaron rexistros solicitouse documentación sobre adxudicacións a esta empresa fundada en Bora (Pontevedra) no ano 1973 e que se dedica a obra pública, estradas, saneamento e edificación.