Un empresario lucense ofreceu a Blanco promocionar a Orozco nas municipais de 2007

O empresario Miguel G.G., representante da empresa asturiana Inca en Lugo e responsable da entidade publicitaria Artenosa, ofreceu ao daquela secretario de Organización do PSOE, o lucense José Blanco, promocionar a José Clemente López Orozco nas municipais do 27 de maio de 2007.

Este empresario expresou a súa disposición a “achegar unha pequena axuda nas próximas eleccións municipais”, xa que era o responsable da empresa que xestionaba a conexión da publicidade nos autobuses urbanos, segundo consta nunha carta intervida no marco da ‘Operación Pokémon’, incluída no sumario, ao que tivo acceso Europa Press, e que foi achada no rexistro da entidade Artenosa baixo o título “Carta Pepe Blanco”.

“Na actualidade son o responsable da empresa que xestiona a concesión da publicidade nos autobuses urbanos da nosa cidade, Lugo. E dende aquí, ofrézoche a ti e ao Partido a posibilidade de anunciar a campaña electoral a favor do noso compañeiro Orozco nas traseiras dos autobuses urbanos da cidade”, preséntase García Gesto.

Neste sentido, explicaba que poñía “a disposición do Partido as traseiras dos autobuses de transporte de viaxeiros por estrada de A Directa, que realizan o traxecto Lugo-Chantada-Ourense”.

CORRER “CON TODOS OS GASTOS”

Ao respecto, sinalaba que “en ambos os dous casos” el mesmo ía correr con todos os gastos pola instalación publicitaria neste efectivo medio propagandístico”.

“Sería mi humilde e desinteresada contribución á promoción da Organización, quen non deberá asumir custo ningún polo servizo,”, engadía, antes de indicar que se lle interesaba a proposta, necesitaba unha resposta e a creatividade do anuncio para poder rotular os buses.

Miguel G.G., segundo consta no sumario, era representante de Inca Renovables, empresa que foi elixida polo goberno local en abril de 2008 para xestionar a antiga fábrica da luz.