Traballadores municipais de Cangas acometen a limpeza do río “Saíñas” para evitar desbordamentos do couce

As concellerías de Obras e Medio Ambiente do Concello de Cangas coordináronse para levar a cabo unha serie de actuacións de acondicionamento e limpeza do río Saíñas coa finalidade de evitar que o seu couce desborde como consecuencia das fortes chuvias que se están rexistrando no municipio durante os últimos meses.

Grazas a estes traballos de limpeza e ao seguimento do estado do río que se están levando a cabo por membros da brigada municipal dende comezos da temporada invernal este ano o Saíñas non desbordou en ningún momento, a pesar do mal tempo, cousa que si sucedía en pasados invernos.

Ao longo dos últimos días a brigada acudiu en tres ocasións para retirar area do couce do río. Cada día os operarios logran sacar unha media de tres tractores de 3m³ de area.