Rey Varela asina un convenio de colaboración coa asociación de veciños Val de Esmelle

Sinatura do convenio

O alcalde de Ferrol, Jose Manuel Rey Varela, asinou esta mañá un convenio de colaboración co presidente da Asociación de Veciños “Val de Esmelle”, Miguel Parra, para a construción dun centro BTT. Este acordo permitirá o acondicionamento do local social da parroquia para centro de bicicleta todo terreo (BTT) na asociación veciñal, así como a sinalización de seis rutas. A achega da Administración ferrolá ascende a un total de 48.859,96 euros.

O rexedor municipal destacou a implicación da asociación veciñal “na recuperación dun dos espazos naturais máis importantes de Ferrol”. Neste senso, definiu a Ruta dos Muíños como “un exemplo de coidado e potenciación dos nosos recursos naturais”. Así, o primeiro edil da cidade considerou fundamental a implicación dos veciños para poder levar adiante este novo proxecto, pioneiro en toda Galicia. Rey Varela sinalou que a práctica deste deporte en contacto permanente coa natureza “encaixa perfectamente cos produtos turísticos que presentamos este ano en FITUR”; ao tempo que salientou o seu carácter promocional “tanto deportivo como turístico” dixo.

Pola súa banda, o presidente da asociación veciñal Val de Esmelle, Miguel Parra, quixo agradeceu o apoio da Corporación Municipal de Ferrol.