Resultados dos partidos das categorías do Santiago Futsal durante a fin de semana

O equipo filial venceu 3-2 ao pechacancelas da táboa, o Vilalba FS, tras unha moi boa primeira parte dos santiagueses, que tiveron o dominio absoluto do balón. O primeiro gol dos locais chegou mediada a primeira parte obra de Fran e o xuvenil Iago fixo o segundo a falta de 3 minutos para o final. Puido aumentar a súa renda antes do descanso tras perdoar numerosas ocasións, do mesmo xeito que nos primeiros minutos da segunda parte, aínda que con menos profundidade.

Aos poucos, o Vilalba foi dominando máis, logrando recortar distancias a falta de 7 minutos para o final. A 47 segundos fixeron o empate, polo que o filial decidiu saír con porteiro-xogador, marcando Pablo Tallón no primeiro ataque nunha pegada exterior o 3-2 definitivo.

Pola súa banda, os equipos femininos do Santiago Futsal perderon nos seus respectivos encontros. O Santiago Futsal A Gaiola A perdeu 1-4 ante Don Froitos nun partido condicionado pola falta de acerto de face ao gol, a pesar de gozar de maior posesión e máis ocasións. O Santiago Futsal A Gaiola B perdeu 6-1 ante Vedra FSF nun partido no que tamén se pagou cara a falta de acerto de face ao gol, a pesar de manter unha boa intensidade durante o partido, ante un rival que tivo o dominio do balón.