Os ‘xenerais da Ulla’ invaden o Entroido de Touro

A parroquia de Fao (Touro) vivirá o vindeiro martes, 4 de marzo, o seu día grande das festas do Entroido 2014. Esta localidade situada no Concello de Touro celebra o martes de entroido o seu tradicional ‘Antroidada’. Ao día seguinte, a capital de Touro, Fonte Díaz, vivirá a súa ‘Feira do Entroido’. Os ‘xenerais da Ulla’ serán os protagonistas en ambas as citas.

A celebración do Entroido de Fao comezará no campo da festa da parroquia a partir de as 16:00 horas. Contará co discurso do ‘correo’ e dos ‘xenerais da Ulla’. Estes protagonistas abordarán, a través de coplas recitadas a viva voz, temas da actualidade política e do momento. Os ‘xenerais’ replicaranse e contrarreplicarán ante os veciños que acudirán ao campo da festa de Fao. Tamén participará ‘a vellada coa súa troulada’. E non faltarán ‘vos consellos dous frades’, que predicarán en verso anécdotas sucedidas na parroquia de Fao e nos arredores.

Xa o 5 de marzo, mércores, coincidindo coa tradicional ‘Feira do día 5’, nesta ocasión será a Feira do Entroido, está previsto un ‘Encontro e atranque de xenerais da Ulla’ de Bama e Fao, parroquias onde teñen lugar as tradicionais celebracións do Entroido en Touro. O día 5, ás 12.00 horas, os ‘xenerais da Ulla’ daranse cita en Fonte Díaz, onde lucirán os seus coloridos traxes durante a celebración da feira. Tamén está previsto un desfile de disfraces. Os asistentes poderán degustar as tapas típicas do entroido nos locais de hostalaría de Fonte Díaz. A batalla será só dialéctica.